Shri Neminatha Basadi at Bastihalli

ಶ್ರೀಕ್ಷೇತ್ರ ಶ್ರವಣಬೆಳಗೊಳದಿಂದ ಸುಮಾರು ನಾಲ್ಕು ಕಿ.ಮೀ. ದೂರದಲ್ಲಿರುವ ಬಸದಿಹಳ್ಳಿಯಲ್ಲಿ ಸುಮಾರು 12ನೇ ಶತಮಾನದಲ್ಲಿ ನಿರ್ಮಾಣವಾದ ಭ. ಶ್ರೀ ನೇಮಿನಾಥ ತೀಥರ್ಂಕರರ ಬಸದಿಯು ಸರಳ ವಾಸ್ತುವನ್ನು ಹೊಂದಿದೆ. ಈ ಬಸದಿಯನ್ನು ಹೊಂದಿರುವುದರಿಂದಲೇ ಈ ಊರಿಗೆ ‘ಬಸದಿಹಳ್ಳಿ’ ಎಂಬ ಹೆಸರು ಬಂದಿದೆ. ಗರ್ಭಗುಡಿಯಲ್ಲಿ ಐದು ಅಡಿ ಎತ್ತರದ ಭ. ಶ್ರೀ ನೇಮಿನಾಥ ತೀಥರ್ಂಕರರ ಭವ್ಯವಾದ ಮೂರ್ತಿಯಿದೆ. ಬಸದಿಯ ಶಿಖರವು ಪಿರಮಿಡಾಕಾರದ ಪಾಂಸನ ಶೈಲಿಯಲ್ಲಿ ಶೋಭಿಸುತ್ತಿದೆ. ಹೊಯ್ಸಳರ ಕಾಲದಲ್ಲಿ ನಿರ್ಮಿಸಲಾಗಿರುವ ಈ ಬಸದಿಯ ಗರ್ಭಗುಡಿಯಲ್ಲಿ ಪ್ರತಿಷ್ಠಾಪಿತ ಪ್ರತಿಮೆಯ ಪೀಠದಲ್ಲಿ ಉಲ್ಲೇಖಿಸಿರುವ ಶಾಸನದಲ್ಲಿ “ಶ್ರೀ ಮೂಲಸಂಘ ದೇಶೀಯಗಣ ಪುಸ್ತಕಗಚ್ಛ ಕೊಂಡಕುಂದಾನ್ವಯ ಶ್ರೀಮನ್ನಯಕೀರ್ತಿ ಸಿದ್ಧಾಂತಚಕ್ರವರ್ತಿಗಳ ಶಿಷ್ಯರು ನೇಮಿಚಂದ್ರ ಪಂಡಿತದೇವರ ಶಿಷ್ಯರು ಚಿಕ್ಕನೇಮಿಚಂದ್ರದೇವರು ಮಾಡಿಸಿದ ನೇಮಿಸ್ವಾಮಿಗಳು ಮಂಗಳ ಮಹಾ ಶ್ರೀ ಶ್ರೀ ಶ್ರೀ” ಎಂದು ಉಲ್ಲೇಖಿಸಲಾಗಿರುವುದರಿಂದ ಭ. ಶ್ರೀ ನೇಮಿನಾಥ ತೀಥರ್ಂಕರರ ಬಸದಿಯನ್ನು ‘ಚಿಕ್ಕನೇಮಿಚಂದ್ರ ದೇವರು’ ಮಾಡಿಸಿರುವರೆಂದು ತಿಳಿದುಬರುತ್ತದೆ. ಗರ್ಭಗುಡಿಯಲ್ಲಿ ಒಂದು ಅಡಿ ಎತ್ತರದ ಸಿಂಹಪೀಠದ ಮೇಲೆ ಸ್ಥಾನಕ ಭಂಗಿಯಲ್ಲಿರುವ ಐದು ಅಡಿ ಎತ್ತರದ, 22 ನೇ ತೀಥರ್ಂಕರರಾದ ಭಗವಾನ್ ನೇಮಿನಾಥ ಮೂರ್ತಿಯು ಪ್ರತಿಷ್ಠಾಪಿತವಾಗಿದೆ. ಮೂರ್ತಿಯ ಭುಜದ ಬಳಿ ಎರಡು ಚಾಮರಗಳನ್ನು ಕಾಣಬಹುದು. ಕಪ್ಪುಕಲ್ಲಿನಲ್ಲಿ ಕಡೆದಿರುವ ಮೂರ್ತಿಯ ಕಾಲಿನ ಬಳಿ ನೇಮಿನಾಥನ ಯಕ್ಷ ಯಕ್ಷಿಯರಾದ ಗೋಮೇಧ ಯಕ್ಷ ಮತ್ತು ಅಂಬಿಕಾ ಯಕ್ಷಿಯರನ್ನು ಕಾಣಬಹುದು. ಮೂರ್ತಿಯ ಶಿರದ ಮೇಲೆ ಮುಕ್ಕೊಡೆಯಿದ್ದರೆ ಹಿಂಭಾಗದಲ್ಲಿ ಸುರುಳಿಯಾಕಾರದ ಸುಂದರವಾದ ಮಕರ ತೋರಣವಿದೆ.