Lord Shri Shantinatha Basadi (Kone Shantishwara Basadi)

ಚಿಕ್ಕಬೆಟ್ಟದಲ್ಲಿ ಉತ್ತರಾಭಿಮುಖವಾಗಿರುವ ಬಸದಿಗಳಲ್ಲಿ ಕೋನೆ ಶಾಂತೀಶ್ವರ ಬಸದಿಯೂ ಒಂದಾಗಿದ್ದು ಲಕ್ಕಿದೊಣೆಯ ಕಡೆಯ ಗೋಡೆಯ ಬಳಿ ಇದೆ. ಇಲ್ಲಿ ಬೆಟ್ಟ ಇಳಿಜಾರಾಗಿರುವುದರಿಂದ ಭೂಮಿಯನ್ನು ಸಮತಟ್ಟು ಮಾಡಿಕೊಂಡು ವೇದಿಕೆ ನಿರ್ಮಿಸಿ ಅದರ ಮೇಲೆ ಈ ಬಸದಿಯನ್ನು ನಿರ್ಮಿಸಿರುತ್ತಾರೆ. ಈ ಬಸದಿಯು ಹೊಯ್ಸಳರ ಕಾಲದ್ದಾಗಿದ್ದು, ಇದನ್ನು ಗಂಗರಾಜನ ಸೋದರನಾದ ಹಿರಿಯ ಏಚಿಮಯ್ಯ ಕ್ರಿ.ಶ. 1117 ರಲ್ಲಿ ಕಟ್ಟಿಸಿದಂತೆ ಶಾಸನ ತಿಳಿಸುತ್ತದೆ. ಈ ಬಸದಿಯ ಒಳಗಡೆ ಹೊಯ್ಸಳರ ಕಾಲದ ಕಂಬಗಳು, ಮುಚ್ಚಿಗೆ ಮುಂತಾದ ಲಕ್ಷಣಗಳನ್ನು ಹೊಂದಿದ್ದರೆ ಹೊರಗಡೆ ಅಂತಹ ಲಕ್ಷಣಗಳನ್ನು ಹೊಂದಿಲ್ಲ. ಅಧಿಷ್ಠಾನದ ಭಾಗಗಳು ಎರಡು ಕಟ್ಟೆ ಬಸದಿಯಂತೆ ಇವೆ. ಇದಕ್ಕೆ ಬಳಸಿರುವ ಕಲ್ಲು ಗಟ್ಟಿಗಲ್ಲು. ಗರ್ಭಗೃಹ, ತೆರೆದ ಅಂತರಾಳ, ನವರಂಗವನ್ನು ಹೊಂದಿರುವ ಈ ಬಸದಿಯಲ್ಲಿ ಗರ್ಭಗೃಹ ಚಿಕ್ಕದಾಗಿದ್ದು, ತೆರೆದ ಅಂತರಾಳ ಅದರಷ್ಟೇ ದೊಡ್ಡದಿದೆ. ಚೌಕಾಕಾರದ ನವರಂಗದಲ್ಲಿ 10 ಕಂಬಗಳಿದ್ದು, ನವರಂಗದ ಮಧ್ಯೆ ಪೂರ್ವ-ಪಶ್ಚಿಮವಾಗಿ ನಾಲ್ಕು ಕಂಬಗಳು ಹಾಗೂ ಉತ್ತರ-ದಕ್ಷಿಣವಾಗಿ ಮೂರು ಮೂರು ಕಂಬಗಳಿವೆ. ನವರಂಗದಲ್ಲಿನ ಕಂಬಗಳ ತಳಭಾಗ ಚೌಕಾಕಾರದ ಪಿಂಡಿ ಮೇಲೆ ವೃತ್ತಾಕಾರವಾಗಿದ್ದು, ತಿರುಗಣಿಯಿಂದ ಮಾಡಿದ ಕಂಬಗಳಾಗಿವೆ. ಬೋದಿಗೆಗಳು ಸರಳವಾಗಿದ್ದು ಮಧ್ಯೆ ಸ್ವಲ್ಪ ಉಬ್ಬಿದ ಪಟ್ಟಿ ಬಂದಿದೆ. ನವರಂಗದ ಮುಚ್ಚಿಗೆಯ ಕಂಬ ಸ್ವಲ್ಪ ಉಬ್ಬಿದೆ. ಶಾಂತೀಶ್ವರನ ಶಿಲ್ಪ 12-13ನೆಯ ಶತಮಾನಕ್ಕೆ ಸೇರಿದ ಶಿಲ್ಪವಾಗಿದ್ದು, ಇದರ ಮೇಲೆ ಇರುವ ಗೋಪುರ ಇಟ್ಟಿಗೆಯ ದಾಗಿದ್ದು ಹಂತ ಹಂತವಾಗಿದ್ದು ಫಾಂಸನ ಮಾದರಿಯಲ್ಲಿದೆ.