Shantinatha Basadi

ಚಂದ್ರಗಿರಿ ಪ್ರವೇಶಿಸಿದೊಡನೆ ಮೊಟ್ಟ ಮೊದಲು ಸಿಗುವ ಬಸದಿಯೇ ಭ. ಶ್ರೀ ಶಾಂತಿನಾಥ ಬಸದಿ. ಮಹಾನವಮಿ ದಿಬ್ಬದ ನೈರುತ್ಯಕ್ಕೆ ಇರುವ ಈ ಬಸದಿಯಲ್ಲಿ ಭ. ಶ್ರೀ ಶಾಂತಿನಾಥ ತೀರ್ಥಂಕರರ 12.10 ಅಡಿ ಎತ್ತರದ ಕಾಯೋತ್ಸರ್ಗದ ಸುಂದರ ಬಿಂಬದ ಕೆತ್ತನೆಯಿದೆ. ಈ ಬಸದಿ ಪೂರ್ಣವಾಗಿ ಜೀರ್ಣೋದ್ಧಾ -ರವಾಗಿರುವುದರಿಂದ ಇದರ ಕಾಲವನ್ನು ಸ್ಪಷ್ಟವಾಗಿ ಹೇಳಲು ಸಾಧ್ಯವಾಗುವುದಿಲ್ಲ. ತೀರ್ಥಂಕರರ ಮೂರ್ತಿಯಲ್ಲಿ ಹೊಯ್ಸಳರ ಕಾಲದ ಹೋಲಿಕೆ ಇರುವುದರಿಂದ ಬಸದಿಯು ಸುಮಾರು 11 ಅಥವಾ 12ನೆಯ ಶತಮಾನಕ್ಕೆ ಸೇರಿದುದಾಗಿದೆ. ಅಧಿಷ್ಠಾನದಲ್ಲಿ ಉಪಪೀಠ, ಕಪೋತಗಳನ್ನು ಗುರುತಿಸಬಹುದಾಗಿದೆ. ಸಂಪೂರ್ಣ ಶಿಲಾಮಯ ಬಸದಿಯಾಗಿದ್ದು, ವಿಜಯನಗರೋತ್ತರ ಕಾಲಕ್ಕೆ ಸೇರಿದ ಎತ್ತರವಾದ ಪದ್ಮಕಾಂತ ಕಂಬಗಳನ್ನು ಮುಖ ಮಂಟಪದಲ್ಲಿ ಬಳಸಿದೆ. ಕಂಬಗಳ ಮೇಲೆ ಸೀಳು ಬೋದಿಗೆಯನ್ನು ಹೊಂದಿದ್ದು ಇದರ ರಚನೆಗೆ ಗಟ್ಟಿಕಲ್ಲನ್ನು ಬಳಸಿದೆ. ಗರ್ಭಗೃಹ ಅಷ್ಟೇ ಅಗಲದ ಅಂತರಾಳ ಮತ್ತು ಮುಖ ಮಂಟಪವನ್ನು ಹೊಂದಿದೆ. ಮೈಸೂರು ಅರಸರ ಆಳ್ವಿಕೆ ಕಾಲದಲ್ಲಿ ಇದು ಜೀರ್ಣೋದ್ದಾರಗೊಂಡಿದೆ.