Siddhanta Basadi

ಚಂದ್ರಗಿರಿಯ ಪೂರ್ವ ಬುಡದಲ್ಲಿ ಹಾಗೂ ಅಕ್ಕನ ಬಸದಿಯ ಹಿಂಭಾಗದಲ್ಲಿ ಸಿದ್ಧಾಂತ ಬಸದಿ ಇದೆ. ಹಿಂದಿನ ಕಾಲದಲ್ಲಿ ಸಿದ್ಧಾಂತ ಗ್ರಂಥಗಳನ್ನು ಈ ಬಸದಿಯಲ್ಲಿ ಸಂರಕ್ಷಿಸಿ ಇಡಲಾಗುತ್ತಿತ್ತು. ಆದ್ದರಿಂದಲೇ ಈ ಬಸದಿಯು ಸಿದ್ಧಾಂತ ಬಸದಿಯೆಂದು ಹೆಸರಾಗಿದೆ. ಆಚಾರ್ಯ ಶುಭಚಂದ್ರ ದೇವರು ಈ ಬಸದಿಯಲ್ಲಿದ್ದ ಷಟ್ಖಂಡಾಗಮದ ಟೀಕಾ ಗ್ರಂಥಗಳಾದ ಧವಲಾ, ಜಯಧವಲಾ, ಮಹಾಧವಲಾ ಪ್ರಾಚೀನ ಓಲೆಗರಿ ಗ್ರಂಥಗಳನ್ನು ಸಂರಕ್ಷಣೆಯ ಉದ್ದೇಶಕ್ಕಾಗಿ ಮೂಡಬಿದಿರೆಗೆ ಕೊಂಡೊಯ್ದಿದ್ದರು. ಈ ಬಸದಿಯಲ್ಲಿ 24 ತೀರ್ಥಂಕರರ ಶಿಲಾಮೂರ್ತಿಯಿದ್ದು, ಅದರ ಮದ್ಯದಲ್ಲಿ ಸುಮಾರು ಎರಡು ಅಡಿಯ ಭ. ಶ್ರೀ 1008 ಪಾಶ್ರ್ವನಾಥರ ಮೂರ್ತಿಯಿದೆ. ಇಲ್ಲಿನ ಶಿಲಾಲೇಖ ಸಂಖ್ಯೆ-417(332)ರಂತೆ ಚತುರ್ವಿಂಶತಿ ತೀರ್ಥಂಕರರ ಮೂರ್ತಿಯನ್ನು ಕ್ರಿ.ಶ. ಸುಮಾರು 1620 ರಲ್ಲಿ ಉತ್ತರ ಭಾರತದ ಒಬ್ಬ ಯಾತ್ರಿಕರು ಪ್ರತಿಷ್ಠಾಪಿಸಿದರೆಂದು ಉಲ್ಲೇಖಿಸುತ್ತದೆ.